Idadi ya vifo kufuatia mkanyagano katika mkutano wa kisiasa wa mwigizaji maarufu wa India na mwanasiasa katika jimbo la kusini la Tamil Nadu imefikia 40, waziri wa afya wa jimbo hilo alisema Jumapili, huku madaktari wakiwatibu angalau watu 124 waliojeruhiwa hospitalini.
Ma Subramanian aliambia Shirika la Habari la Associated Press kwamba watu 36 walikuwa wamefariki walipofikishwa hospitalini Jumamosi usiku na wengine wanne walifariki baadaye. Alisema waliojeruhiwa wengi wao wako katika hali thabiti. Waliokufa walijumuisha watoto tisa, alisema Subramanian.
Makumi ya maelfu ya watu walikusanyika katika wilaya ya Karur Jumamosi kuhudhuria mkutano wa Joseph Vijay Chandrasekhar, anayejulikana kwa jina la kisanii na kitaalamu kama Vijay, licha ya joto kali. Vijay ni mmoja wa waigizaji wenye mafanikio makubwa zaidi katika Tamil Nadu na anagombea nafasi ya kisiasa katika uchaguzi wa jimbo uliopangwa kufanyika mapema mwaka 2026.
Katika majimbo ya kusini mwa India, hasa Tamil Nadu, baadhi ya nyota wa filamu wamefanikiwa kuwa wanasiasa maarufu.
Umati mkubwa
S. Sabesan, mkazi wa eneo hilo aliyekuwa kwenye mkutano huo, alisema Vijay alitarajiwa kuhutubia mkutano huo karibu saa sita mchana lakini alifika zaidi ya saa sita baadaye. Alisema wakati huo, umati mkubwa ulikuwa umejaa barabarani.
"Mabango mengi na kamba ziliwekwa kuzunguka eneo hilo" kwa ajili ya kudhibiti umati, Sabesan alisema, akiongeza kuwa umati ulikuwa mkubwa kiasi kwamba "hakuna aliyeweza kuudhibiti."
Watu kadhaa "walizimia wakati akihutubia mkutano huo. Vijay alisitisha hotuba na kuita gari la wagonjwa kuwasaidia," alisema Sabesan, mfanyabiashara wa nguo mwenye umri wa miaka 42.
R. Rajendaran, wakili wa Karur aliyeshuhudia mkutano huo na ajali iliyofuata, alisema wakati fulani Vijay alirusha chupa za maji kwa umati kutoka juu ya gari lake la kampeni.
Uchunguzi waanzishwa
"Wakati alipoamua kuondoka na gari lake lilipoanza kusonga, vurugu zilianza wakati mamia ya mashabiki na wafuasi wake walipoanza kufuata gari lake," Rajendaran alisema. "Hiyo ndiyo ilisababisha mkanyagano."
Subramanian, waziri, alisema "kulikuwa na ukosefu wa nidhamu" kwenye mkutano huo. Serikali imetangaza uchunguzi unaoongozwa na jaji mstaafu ambaye atawasilisha ripoti ndani ya mwezi mmoja, alisema.
Waziri Mkuu wa Tamil Nadu, M.K. Stalin, ametangaza msaada wa zaidi ya dola 11,000 kwa kila familia ya waliofariki.
Vijay alistaafu kuigiza mwaka 2024 na kuanzisha chama chake cha kisiasa, Tamilaga Vettri Kazhagam. Amekuwa akivutia umati mkubwa kwenye mikutano yake ya hadhara.
Waziri Mkuu wa India atoa pole kwa familia za waliofariki
Masaa machache baada ya ajali hiyo, Vijay alitoa rambirambi zake.
"Moyo wangu umevunjika," aliandika kwenye X. "Ninateseka kwa maumivu makali yasiyoweza kuelezeka kwa maneno."
Waziri Mkuu wa India, Narendra Modi, alisema tukio hilo "lisilo la bahati" lilikuwa "la kuhuzunisha sana."
Mikanyagano ni jambo la kawaida nchini India wakati umati mkubwa unakusanyika. Mnamo Januari, angalau watu 30 walifariki wakati makumi ya maelfu ya Wahindu walipojitokeza kuoga katika mto mtakatifu wakati wa sherehe ya Maha Kumbh, mkusanyiko mkubwa zaidi wa kidini duniani.
