Rais wa Madagascar, Andry Rajoelina, ameahirisha hotuba yake ya kitaifa iliyokuwa ikisubiriwa kwa muda mrefu, hali ambayo imeongeza wasiwasi kuhusu alipo baada ya siku kadhaa za maandamano yanayomtaka ajiuzulu.
Rajoelina anakabiliwa na changamoto kubwa zaidi kwa uongozi wake tangu alipoingia madarakani, huku kukiwa na wiki kadhaa za maandamano ya mitaani ambayo baadaye yaliungwa mkono na kikosi cha jeshi kilichokuwa na uasi.
Kiongozi huyo mwenye umri wa miaka 51 hajaonekana hadharani tangu Jumatano iliyopita na inadaiwa kuwa alikimbia nchi kwa kutumia ndege ya kijeshi ya Ufaransa, kulingana na ripoti ya Radio France Internationale. Mamlaka za Ufaransa hazikujibu mara moja ombi la shirika la habari la AFP la kuthibitisha taarifa hiyo.
Rajoelina alitarajiwa kuhutubia taifa saa moja usiku (1600 GMT), lakini hotuba hiyo ilicheleweshwa kwa saa moja na nusu baada ya "kundi la vikosi vya jeshi kutishia kuchukua udhibiti wa vyombo vya habari vya serikali," kulingana na taarifa ya urais kwenye Facebook.
Maandamano yazidi kupamba moto
Urais haukutaja ni nani waliokuwa wamejaribu kuzuia matangazo hayo. Mkuu mpya wa Majeshi, Jenerali Demosthene Pikulas, "alienda eneo hilo kusuluhisha, kupanga na kuchukua hatua dhidi ya hali hiyo," ilisema taarifa hiyo.
Maandamano hayo awali yalilenga ukosefu wa mara kwa mara wa umeme na maji nchini Madagascar lakini yamegeuka kuwa harakati pana ya kupinga serikali, ikimtaka Rajoelina kujiuzulu.
Umoja wa Mataifa umesema kuwa angalau watu 22 waliuawa katika siku za mwanzo za maandamano hayo, lakini serikali inasema idadi ya vifo ni ndogo zaidi.
