Rais Wavel Ramkalawan ameahidi kuhakikisha mchakato wa kukabidhi madaraka kwa rais mteule wa Ushelisheli, Patrick Herminie, unafanyika kwa utaratibu na heshima baada ya kukamilika kwa duru ya pili ya uchaguzi wa urais wa mwaka 2025.

Ramkalawan na Herminie walikutana kwa mazungumzo yasiyo rasmi katika Ikulu ya Taifa siku ya Jumatatu kujadili mchakato wa mpito na kubadilishana mawazo kuhusu masuala muhimu ya kitaifa, yakiwemo usalama, uthabiti wa kiuchumi, na umuhimu wa kudumisha amani wakati wa makabidhiano.

Katika ahadi ya pamoja, viongozi hao wawili walisisitiza kujitolea kwao kulinda umoja, amani, na utamaduni wa kidemokrasia wa Shelisheli wakati taifa hilo la visiwa linaingia katika sura mpya ya kisiasa.

Herminie, kiongozi wa upinzani, alitangazwa mshindi wa duru ya pili ya uchaguzi wa urais uliofanyika Jumamosi na tume ya uchaguzi ya nchi hiyo, na hivyo kuwa rais wa sita wa Shelisheli.

‘Kudumisha urithi’

Ramkalawan alimpongeza mrithi wake, akielezea fahari yake kwa mafanikio ya utawala wake.

“Ninaondoka na urithi unaowafanya marais wengi kuona aibu... Natumaini Rais Herminie ataendelea kudumisha kiwango kama hicho,” alisema Ramkalawan.

Shelisheli, ambayo ilikuwa koloni la Ufaransa na baadaye Uingereza, ilipata uhuru mwaka 1976. Uchaguzi wa kwanza wa vyama vingi ulifanyika mwaka 1993 baada ya kupitishwa kwa katiba mpya.

Visiwa hivyo vinakabiliwa na changamoto za mabadiliko ya tabianchi, ikiwa ni pamoja na kuongezeka kwa viwango vya bahari, kuzorota kwa mifumo ya ikolojia ya baharini – hasa miamba ya matumbawe – pamoja na maporomoko ya ardhi, mafuriko, na ukame, changamoto ambazo zinamsubiri kiongozi mpya.

Robo tatu ya raia wa nchi hiyo wapatao takriban 120,000 wanaishi katika Kisiwa cha Mahe, ambako mji mkuu Victoria upo, kulingana na data ya Benki ya Dunia ya mwaka 2024.