Zoezi la kuhesabu kura linaendelea nchini Malawi huku taifa hilo likisubiri matokeo ya Uchaguzi wa Urais na Bunge.

Wagombea wapatao 17 wanashiriki katika kinyang'anyiro cha urais, ambapo Rais Lazarus Chakwera anawania muhula wa pili huku akikabiliwa na upinzani mkali kutoka kwa mtangulizi wake, Peter Mutharika.

Matokeo kutoka vituo vya kupigia kura yanapelekwa kwenye vituo vya kujumlisha kura vya majimbo kabla ya kusafirishwa hadi kituo cha kitaifa cha kujumlisha kura.

Vyombo vya habari vya ndani vimeruhusiwa kutangaza matokeo ya awali kutoka vituo vya kupigia kura, kwa mujibu wa ripoti ya Shirika la Habari la Malawi (Malawi News Agency).

“Tume ya Uchaguzi ya Malawi (MEC) inaruhusu vyombo vya habari kutangaza matokeo yasiyo rasmi ambayo wamekusanya hadi sasa, lakini wanapaswa kuhakikisha kuwa takwimu hizo zimethibitishwa na maafisa wa tume kabla ya kutangazwa kwa umma,” alisema Mwenyekiti wa MEC, Jaji Annabel Mtalimanja, kama alivyonukuliwa.

Ushindi wa moja kwa moja katika uchaguzi wa urais unahitaji zaidi ya asilimia 50 ya kura, hali inayofanya duru ya pili kuwa na uwezekano mkubwa, ambayo inapaswa kufanyika ndani ya siku 60, kwa mujibu wa waangalizi.

Mfumuko wa bei na gharama za juu za chakula vilikuwa masuala makuu yaliyowakumba wapiga kura. Taifa hilo limekumbwa na kudorora kwa uchumi katika miaka ya hivi karibuni, huku kimbunga kikubwa na ukame wa kikanda vikiharibu mazao na kuongeza ugumu wa maisha.

Nchi hiyo yenye watu wapatao milioni 22 pia ilipiga kura Jumanne kuchagua wabunge na madiwani wa mitaa.