Ma’aikatar Tsaron Ƙasa ta Turkiyya ta sanar da cewa Rundunar Sojin Sama ta Turkiyya tana halartar atisayen NATO Tiger Meet 2025, wanda ake gudanarwa a ƙasar Portugal wanda aka fara gudanarwa a ranar 18 ga Satumba zuwa 3 ga Oktoba.
Turkiyya ta tura jiragen yaki guda uku na F-16 da jami’an sojin sama 53 zuwa wannan atisaye, wanda ya yi fice wurin inganta haɗin kai da haɗin gwiwa tsakanin ƙasashen ƙawancen NATO da abokan hulɗa, in ji ma’aikatar a shafin NSosyal, wato shafin sada zumunta na Turkiyya.
Atisayen ya haɗa da rundunonin sojin sama daga Jamus, Austria, Jamhuriyar Czech, Faransa, Birtaniya, Switzerland, Italiya, Sifaniya, Poland, Portugal, da Girka, tare da sassan NATO.
Halin da Turkiyya ta nuna wajen halartar wannan atisaye yana nuna muhimmiyar rawar da take takawa a cikin NATO, tare da nuna shirye-shiryenta na aiki da kuma sadaukarwarta ga haɗin gwiwar ƙawancen.
NATO Tiger Meet, wanda yake ɗaya daga cikin atisayen haɗin gwiwa na jiragen sama na ƙungiyar da aka jima ana yi, yana bayar da muhimmiyar dama don ƙarfafa ƙwarewar dabaru, gwada hanyoyin haɗin gwiwa, da zurfafa alaƙar tsaro a daidai wannan lokaci da ƙalubalen tsaro na yankin ke ƙaruwa.
