Ɗan takarar jam'iyyar hamayya a Kamaru Issa Tchiroma Bakary ranar Litinin da tsakar dare ya yi iƙirarin lashe zaɓen shugaban ƙasar wanda aka gudanar ranar Lahadin da ta gabata, sannan ya yi kira ga Paul Biya da ya amsa shan kaye tare da “martaba gaskiyar da ta bayyana ta hanyar masu zaɓe”.

"Nasarar da muka samu a bayyane take. Dole a amshe ta," a cewar Tchiroma a wata sanarwa da ya wallafa a shafinsa na Facebook daga garinsu na Garoua.

"Mutane sun zaɓi wanda suke so. Kuma dole a mutunta hakan."

Tchiroma Bakaray, mai shekara 76, shi ne tsohon mai magana da yawun gwamnati kuma tsohon minista, wanda ya raba gari da Paul Biya a farkon shekarar nan inda ya ƙaddamar da gagarumin yaƙin neman zaɓe da ya samu karɓuwa daga ɗimbin jama’a da kuma wani ɓangare na ‘yan adawa da ƙungiyoyi masu zaman kansu.

Ko da yake an amince a riƙa bayyana sakamakon zaɓe, sai dai kotun tsarin mulkin Kamaru ce kaɗai take da alhakin sanar da sakamakon ƙarshe, kuma ba a yarda “kowa ya yi gaban kansa ba”.

A zaɓen shugaban ƙasa na 2018, ɗan takarar jam’iyyar hamayya na wancan lokaci Maurice Kamto ya ayyana kansa a matsayin wanda ya lashe zaɓen kwana guda bayan kammala kaɗa ƙuri’a.

Daga bisani an kama shi sannan aka yi amfani da barkonon-tsohuwa da ruwan zafi wajen tarwatsa magoya bayansa da suka yi zanga-zanga.

Paul Biya, mai shekara 92, wanda shi ne shugaban ƙasa mafi tsufa a duniya, yana neman yin ta-zarce a karo na takwas bayan ya shafe shekaru 43 a kan mulki.

Tchiroma ya yaba wa masu kaɗa ƙuri’a kan bijire wa barazanar da gwamnati ta yi musu inda suka kafa suka tsare har sai da aka sanar da sakamakon zaɓuka a akwatunan zaɓensu.

"Kazalika ina miƙa godiyata ga ‘yan takara waɗanda suka suka aiko mini da saƙonnin taya murna kana suka amince da ƙarfin ikon mutane," in ji Tchiroma Bakary.

Gwamnatin Kamaru ba ta ce uffan ba game da iƙirarin da Tchiroma Bakary ya yi na lashe zaɓen shugaban ƙasar, sai dai Ministan Gudanarwa Paul Atanga Nji ya yi gargaɗi a ƙarshen mako cewa duk ɗan takarar da ya yi gaban kansa wajen ayyana kansa a matsayin shugaban ƙasa, zai iya fuskantar hukuncin “cin amanar ƙasa”.

Ya ƙara da cewa kotun tsarin mulkin ƙasar ce kawai take da ikon sanar da sakamakon zaɓen shugaban ƙasar.