Watu wawili waliuawa wakati maafisa wa polisi walipofyatua risasi kwa kundi la watu waliokuwa wakijaribu "kuvamia" kituo cha polisi nchini Morocco siku ya Jumatano, vyombo vya habari vya serikali viliripoti, huku maandamano - ambayo wakati mwingine yamekuwa na vurugu - yakitikisa taifa hilo la kaskazini mwa Afrika.
Maandamano yamekuwa yakiendelea Morocco kwa siku kadhaa, yakichochewa na kundi la GenZ 212, ambalo limeundwa hivi karibuni kupitia jukwaa la mtandao wa Discord, huku waandaaji wake wakiwa hawajulikani.
Wizara ya Mambo ya Ndani ya Morocco ilisema Jumatano kwamba zaidi ya watu 400 walikamatwa na karibu 300 walijeruhiwa wakati wa maandamano hayo, ambayo yanadai mabadiliko katika sekta za afya ya umma na elimu.
Kundi la watu lilijaribu baadaye jioni hiyo "kuvamia" kituo cha polisi huko Lqliaa, karibu na mji wa pwani wa Agadir, shirika la habari la serikali MAP liliripoti, likinukuu maafisa wa eneo hilo.
Uchunguzi wa Kisheria
Maafisa "walilazimika kutumia silaha, kujilinda, ili kuzuia shambulio hilo," ambalo lililenga "kunyakua risasi, vifaa na silaha", MAP ilinukuu maafisa hao wasiojulikana wakisema.
Maafisa hao walisema polisi walifanikiwa kuzuia shambulio la awali, lakini kundi hilo liliwarudia tena, wakiwa na "silaha zenye nguvu," MAP iliripoti.
"Wakati wa jaribio hili, watu wawili walifariki kutokana na majeraha ya risasi, huku wengine wakijeruhiwa wakati wa kushiriki katika shambulio hilo," maafisa walisema.
Uchunguzi wa kisheria kuhusu tukio hilo umeanzishwa, MAP iliripoti.
Mamia ya waandamanaji walikusanyika Jumatano katika miji kadhaa ya Morocco, ikiwemo Casablanca, Tangier na Tetouan.
Wanataka Waziri Mkuu Ajiuzulu
Maandamano hayo yalikuwa yakifanyika kwa idhini rasmi kwa mara ya kwanza tangu yalipoanza Jumamosi.
Waandamanaji walitaka "kuondolewa kwa ufisadi" pamoja na "kupatikana kwa uhuru, heshima na haki ya kijamii."
Sehemu kubwa ya maandamano hayo imekuwa ya amani, ingawa sio yote.
Mwandishi wa AFP huko Sale, mji uliopo karibu na mji mkuu wa Rabat, alishuhudia watu waliovaa kofia wakichoma magari ya polisi na tawi la benki.
Vyombo vya habari vya ndani pia viliripoti matukio ya uharibifu huko Sidi Bibi karibu na Agadir, na katika miji midogo ambayo GenZ 212 haikuitaja kama maeneo ya maandamano.
